Аҧсны Аҳәынҭқарра
акультуреи аҭоурых-культуратә
ҭынха ахьчареи рминистрра

Министерство культуры и охраны
историко-культурного наследия
Республики Абхазия

 
 
Аҧсны Ахада Хьыбла Герзмаа дидикылеит 06.08.2017

Аҧсны Ахада Хьыбла Герзмаа дидикылеит

Август 6 рзы Аҧсны Ахада Рауль Ҳаџьымба дидикылеит Аҧсни Урыстәылеи жәлар рартист, «Ахьӡ-Аҧша» аорден актәи аҩаӡара занашьоу Хьыбла Герзмааи амузикатә фестиваль «Хьыбла Герзмаа шәаалыҧхьоит…» иалахәу артистцәеи. Аҳәынҭқарра Ахада асасцәа аҧсшәа реиҳәеит.

«Сара даара сеигәырҕьоит Аҧсны шәахьаҭааз. Ҳгәы еизҳауеит, Хьыбла леиҧш аеҵәаџьаа дахьҳамоу, амузика абзиабаҩцәа ргәы зырҧхауа. Ҳгәы аладууп, есышықәса ас еиҧш иҟоу афестиваль ҳара ҳҳәынҭқарраҟны иахьымҩаҧысуа, Хьыбла илыцны арахь иахьымҩахыҵуа лҩызцәа, ҳзыӡырҩцәа агәырҕьара рзаазго. Ҳара ҳганахь ала иҳалшо зегь ҟаҳҵоит афестиваль анарха аиуразы. Иҭабуп ҳәа шәаҳҳәоит, иахьа шәыдгылара ахьҳашәҭаз», – азгәеиҭеит Р. Ҳаџьымба.

Хьыбла Герзмаа Аҳәынҭқарра Ахада иҭабуп ҳәа иалҳәеит исасдкылараз.

«Идуӡӡаны иҭабуп ҳахьшәыдышәкылаз. Сара сҩызцәа сыманы сааит – Фабио Мастранџьело, Агәында Кулаева, Алеқсеи Татаринцев. Иахьа ҳара ахәаҧшцәа ирыдаагалоит апрограмма шьахә ала ишьақәгылоу аконцерт. Сеигәырҕьоит, афестиваль азҿлымҳара ду ахьцәырнаго ахәаҧшцәа рҟны. Ҳара иҳалшо зегь ҟаҳҵоит Аҧсны акультура аизҳаеизыҕьаразы. Ҳаигәырҕьоит ҩаҧхьа арахь ҳахьааз, агәаҳәара ҳамоуп ахәаҧшҩы иаҳасабала ҳконцерт шәаҭаар», – лҳәеит Хьыбла Герзмаа.

Адирижиор Фабио Мастранџьело Аҳәынҭқарра Ахада иҭабуп ҳәа иеиҳәеит ааҧхьараз, лымкаалагьы иазгәеиҭеит Хьыбла Герзмаа лбаҩхатәреи лыҧшӡареи.

«Сеигәырҕьоит, Хьыбла ааҧхьара ахьҳалҭаз. Ҳара ҳзы уи даҳҩыза мацарам, уи зеиҧшыҟам еҵәаџьаауп. Сеигәырҕьоит, аҳәынҭқарраҟны иҟоу ауадаҩрақәа рыӡбара анаҩсгьы, шәара излашәылшо ала Хьыбла лус аҟны ацхыраара ахьлышәҭо. Ас еиҧш зымчу атәыла дуқәа роуп», – азгәеиҭеит иара.

Ареспублика Нхыҵ Уаҧстәыла – Аланиа зҽаҧсазтәыз артист Агәында Кулаева иазгәалҭеит, Аҧсны лыҧсадгьыл аҟнеиҧш лхы шылбо.

«Ҩымш ҵуеит ара ҳаҟоуижьҭеи, аҩны сыҟоушәа ацәанырра соуеит. Хьыбла иахьабалак илҳәоит, сҩызцәа сыцны сааит ҳәа. Ари акыр иаҧсоуп ҳара ҳзы. Аламала исгәалашәом, Аҧсны аиҧш даҽа џьара иаҳҧылеит ҳәа, ас гәаартрыла, ҳаҭырқәҵарыла», – лҳәеит Агәында Кулаева.

Ареспублика Нхыҵ Уаҧстәыла – Аланиа зҽаҧсазтәыз артист Алеқсеи Татаринцев иазгәеиҭеит, ас еиҧш асасдкылара артистцәа аҭакҧхықәра ду шрықәнаҵуа.

«Ишаадыруа еиҧш, Аҧсны – ҳәынҭқарра дуум, аха уи агәаҭа ҭбаауп, иҧхоуп. Шәысасдкылара ҳара ҳзы иҳаҭыр дууп. Уи ҳара аҭакҧхықәра ду ҳақәнаҵоит. Жәаҳәарада, ҳара иҳалшо зегь ҟаҳҵоит», – азгәеиҭеит Алеқсеи Татаринцев.

«Иҭабуп ҳәа шәасҳәарц сҭахуп. Жәаҳәарада, иахьа аконцерт аҟны ҳашәзыҧшуп. Афестиваль амҩаҧгара аҧсшьара мшқәа ирықәшәеит, аха уеизгьы аусбарҭақәа зегьы аус руеит, афестиваль ишахәҭоу имҩаҧысразы. Зегьы ирҭахуп аконцерт ахәаҧшра. Иҭабуп ҳәа иасҳәарц сҭахуп амеценат Николаи Ачба. Иахьа иара ибзоураны еиҿкаахоит аконцерт ишиашо ицо атранслиациа атеатр аҿаҧхьа адәаҟны. Ажәакала, аныҳәа ду ҳазыҧшуп», – азгәалҭеит Аҧсны Аҳәынҭқарра акультуреи аҭоурых-культуратә ҭынха ахьчареи рминистр Ельвира Арсалиаҧҳа.

Аҳәынҭқарра Ахада анаукеи, акультуреи, аҵареи рызҵаарақәа рзы иабжьагаҩ Владимир Занҭариа иазгәеиҭеит афестиваль ароль ду Аҧсны адунеи аларҵәаразы.

«Акультура ацхыраарала ҳара иҳамоуп алшара адунеи алахәра, уи аус аҟны акрызҵазкуа ароль нанагӡоит ари апроект. Иҭабуп ҳәа ласҳәарц сҭахуп Хьыбла Леуарса-иҧҳа, акыр шықәса еиҧымҟьарада афестиваль ахьымҩаҧылго. Сара избоит, шаҟа ааҧсареи агәацҧыҳәареи адылҵо ари аус. Уи иаалыҧхьоит адунеи еицырдыруа амузикантцәа, даргьы лакҩакрада лааҧхьара рыдыркылоит. Насыҧ дуны иҳаҧхьаӡоит, ас еиҧш ауаа дуқәа рҧылара алшара ахьҳамоу», – азгәеиҭеит В. Занҭариа.

Аҳәынҭқарра Ахада иазгәеиҭеит игәы цых-цыхуа аконцерт дшазыҧшу, асасцәа ирзеиҕьеишьеит ақәҿиарақәа.


Шьҭахьҟа