Аҧсны Аҳәынҭқарра
акультуреи аҭоурых-культуратә
ҭынха ахьчареи рминистрра

Министерство культуры и охраны
историко-культурного наследия
Республики Абхазия

 
 
Август 16 аҽны С. Ҷанба ихьӡ зху Аҧсуа ҳәынҭқарратә драматә театр аҟны имҩаҧысит XVI амузикатә фестиваль «Хьыбла Герзмаа шәаалыҧхьоит…» 08.08.2017

Август 16 аҽны С. Ҷанба ихьӡ зху Аҧсуа ҳәынҭқарратә драматә театр аҟны имҩаҧысит XVI амузикатә фестиваль «Хьыбла Герзмаа шәаалыҧхьоит…»

Аконцерт иалахәын адирижиор Фабио Мастранџьело напхгара ззиуа Москватәи акамертә оркестр, Аҧсни Урыстәылеи жәлар рартист Хьыблаа Герзмаа (асопрано), Ареспублика Нхыҵ Уаҧстәыла – Аланиа зҽаҧсазтәыз артистцәа Алеқсеи Татаринцев (атенор), Агәында Кулаева (амеццо-сопрано).

Афестиваль аартуа, Аҧсны акультуреи аҭоурых-культуратә ҭынха ахьчареи рминистр Ельвира Арсалиаҧҳа иазгәалҭеит, афестиваль амҩаҧгара акыр зҵазкуа хҭысуп акультура азы мацара акәымкәа, иара ҳҳәынҭқарра ҳаамҭазтәи аҭоурых азгьы.

«Афестиваль мҩаҧысуеит еиуеиҧшым аҳәынҭқаррақәа рҟны. Иахьабалак, адунеи иреиҕьу амузикатә сценақәа рҟны Хьыбла дахьықәгыло, еицырдыруа амузикатә ҧҵамҭақәа рнаҩсгьы, иналыгӡоит аҧсуа музика, уи алагьы ҳмилаҭтә культура адунеи иалалырҵәоит», – азгәалҭеит аминистр.

Хьыбла Герзмаа иазгәалҭеит: «Сара ҩаҧхьа сеигәырҕьоит ари асценахь ацәырҵра. Сеигәырҕьоит, сыҧсадгьыл ашҟа сахьааз. Ианакәзаалак сара агәаҳәара сымоуп саацыҧхьаӡа иҧшӡоу, азҿлымҳара зуҭаша апрограмма аагара».

Иара убас атеатр аҿаҧхьа адәаҿы, ажәҩан аҵаҟа, еиҿкаан ишиашоу ицоз афестиваль атранслиациа.

Афестиваль анҵәамҭаз афестиваль иалахәыз артистцәа адәныҟа ахәаҧшцәа рышҟа ицәырҵит, уаҟа урҭ инарыгӡеит неаполитантәи ашәа «Funiculi Funicula...».

Акоцерт абилеҭқәа рыҭираан еизгаз аҧара зегьы дәықәҵахоит Ф. Искандер ихьӡ зху Аҳәынҭқарратә аурыс драматә театр аҿиаразы.


Шьҭахьҟа